片名：黑幕謎情 Eastern Promises
日期：15/11/2007
時間：19:50
片長：101 分鐘
地點：Palace IFC House 1
人數：幾十個

今年第一百次入戲院

離開戲院o個陣，諗起之前睇到一d關於《色，戒》ge報道，話《色，戒》o係影片開始冇幾耐就會帶觀眾進入低氣壓，我睇o個陣就唔係好feel到，今日睇呢齣Eastern Promises，我覺得就真係帶到觀眾進入低氣壓

唔係由頭緊張到尾ge類型，又唔係好似之前睇babel同united 93 o個種略帶一點煽情ge沉重。成齣戲都俾我一種好灰暗ge感覺，周圍都好似好唔安全咁。成齣戲都o係英國首都倫敦度拍，呢齣戲入面ge倫敦同我去過ge好唔同，同Love Actually, Bridget Jones's Diary, Closer, Breaking and Entering入面ge倫敦好唔同…

寫到呢度，我又諗起年頭睇電影節ge一齣戲 London to Brighton，呢齣Eastern Promises同London to Brighton有少少相似，但後者故事同人物性格比較簡單，而且比較緊湊，Eastern Promises入面故事比London to Brighton複雜少少，但人物性格就複雜好多，因為好多人都各懷鬼胎，唔知可以信邊個，觀眾亦唔一定可以判斷到邊個係好人邊個係壞人。

故事簡單，易follow，亦有一兩個細ge「估你唔到」位。(請反白) (其實都有少少估到viggo mortensen係臥底，但有d估唔到vincent cassel係因為俾人話係基佬而殺人，因為唔係睇到最尾，都唔係好覺佢會係基佬)一眾演員演出相當精彩，尤其係飾演幾個黑幫大佬ge男演員，當中Viggo Mortensen ge演出絕對值得最少一個最佳男主角提名。佢扮呢個俄國黑幫成員真係幾入型入格，唔知同佢有丹麥血統有冇關。我唔識俄文，但就咁聽佢講都覺得佢幾流利下，最犀利o係o個種陰沉ge感覺。Naomi Watts就淪為配角，冇乜發揮

呢齣電影都幾暴力下，有幾個位都幾核突及/或恐佈下，到而家，離開戲院幾個鐘頭，都仲歷歷在目。佢三個主要暴力場面都去得幾盡，做得好真，尤其係墳場o個段同浴室o個場…(請反白) 割頸 (見住佢d血大量咁流出o黎！！)同插眼呢幾下真係做得好真，真係好想知佢點拍…加埋個ok explicit ge性愛場面，唔怪得三級

後記：人果然係最恐佈ge

後記2：Viggo Mortensen ge造型幾好，唔知係咪因為佢好多戲服都係Armani呢 XDDD