香港新浪網 MySinaBlog
« 上一篇 | 下一篇 »
Ben | 30th Sep 2007 | 中文 - 戲院, 香港亞洲電影節2007 | (860 Reads)

片名:沉睡的青春
日期:29/9/2007
時間:21:50
地點:Palace APM House 4
人數:百幾個
票價:$46.8

Rating: 34+17+13+12+3 = 79

睇完kenny由art center匆匆趕去APM睇呢齣,趕得切入場之餘,仲見到導演鄭芬芬同男主角張孝全(!)o係外面接受無線娛樂台ge訪問。

Picture

呢齣係導演鄭芬芬的第一部長片,佢之前都係拍廣告、電視較多

張孝全o係戲入面一人分飾兩角:蔡子涵 同 陳柏宇。故事講蔡子涵每日下晝三點都會去搵中學同學徐青青 (新人郭碧婷飾演) 整錶,藉此見佢一面,每次俾錢仲要將d錢整到一個個cube咁,但徐青青自畢業後都冇聯絡過中學同學,亦唔記得蔡子涵係乜樣。後來青青鍾意左蔡子涵,但同時又發現左一個秘密。至於陳柏宇,就係蔡子涵ge好朋友。

我覺得百老匯段劇情簡介有少少穿橋...

在懷舊鐘錶店上班的孤獨女孩,因為一個自稱是中學同學的男孩的出現,令她那有如時鐘般規律刻板的生活帶來奇幻浪漫。本來甜蜜的熱戀,最後卻以男孩神秘失蹤告終。女孩循著畢業通訊錄的資料打電話到男孩的家,卻發現男孩原來早已離世,身分成謎。

我覺得故仔個setting幾特別:例如平時好少話搵女仔修理鐘錶,但戲入面修理鐘錶ge係一個女仔。仲有心理病、等但唔上ge火車等等。

導演仲好刻意玩鏡頭,例如轉90度咁影,上下倒轉咁影,有好多轉接位佢都用一d好似水彩畫ge畫面再加文字去交帶,完場之後問導演,佢話呢d部分主要係講青青的,青青係一個比較內歛、唔係咁講野ge人,所以就用呢個方法去交帶。

張孝全做得幾好呀,感覺上好過佢o係盛夏光年o個陣。今次佢可以話係集盛夏光年入面余守恒同康正行個性為一體:一個外向,一個內歛。上次佢做外向型ge余守恒我覺得只係外型上比較好,演就一般,今次做內向型ge蔡子涵我覺得佢做得幾好,雖然佢身形外表唔似內向ge人,但戴副眼鏡,加少少閃縮,少少怕醜,內向ge感覺好突出,俊朗ge外型冇令佢有格格不入ge感覺,至於飾演外向d ge陳柏宇就「戲份」較少,但o個種輕浮帶點無奈都做得幾好。佢飾演o個兩個角色分別都幾明顯,外表上有/冇眼鏡固然係一個分別,行為上都有,望下佢兩個行路ge姿勢就知了。

女主角郭碧婷都做得幾好,感覺上盛夏光年ge杜慧嘉應該搵佢做。

入場前有postcard派,完場後有Q&A,臨尾仲有個小小簽名會,我都俾左一張張孝全簽名…原來佢同我差唔多高。據聞佢呢幾日o係香港拍緊戲,唔怪得佢個樣好似好累咁

Picture

片名叫《沉睡的青春》,我諗係因為子涵對青青呢份中學時期ge愛freeze左十年 (雖然我唔明點解十年後先搵番青青)

戲入面徐青青講左一句:「我只要等到三點以後就好了…三點以後,他就會開始愛我…」聽到呢度,我有d感動。

這就是青春

伸延閱讀:

《沉睡的青春》網誌

留言(2) | 引用(0) | 話題(點睇)

[2] Re:
Kenji Chan :
Sounds good!!!

It's not bad, but i think it can be better


[引用] | 作者 Ben | 8th Oct 2007 | [舉報垃圾留言]

[1]

Sounds good!!!


[引用] | 作者 Kenji Chan | 6th Oct 2007 | [舉報垃圾留言]