香港新浪網 MySinaBlog
« 上一篇 | 下一篇 »
Ben | 28th Aug 2007 | 中文 - 戲院 | (513 Reads)

節目名稱:《潁州的孩子》The Blood of Yingzhou District
日期:27
/8/2007
片長:29 分鐘 (《朱力亞的故事》), 39分鐘 (《潁州的孩子》)
地點:百老匯電影中心 Broadway Cinematheque
位置:G行
人數:百幾個
票價:$44

 

Rating: 84

Indpanda國際短片節o係8/8開始,我到今日先睇第一個節目《潁州的孩子》,由兩齣楊紫燁女士 (Ruby Yang) 執導ge紀綠片組成:《朱力亞的故事》以及今年奧斯卡最佳紀錄短片《潁州的孩子》

《朱力亞的故事》講一個武漢女大學生得到愛滋病之後ge經歷。佢係中國第一個公開自己感染愛滋病毒ge人。紀錄片入面,由知道自己得到呢個病 (o係前男友度惹番來)、受盡歧視,講到佢勇敢面對群眾 (公開左之後佢要面對多好多倍ge難聽說話,例如有人話佢抵死)、幫助其他病者同埋周圍去講talk、宣傳防愛滋訊息。佢o個種堅毅,同埋對別人 (父母及前男友) o個份愛,令人印象深刻。

紀錄片前半段拍得係比較灰暗同埋帶一點驚嚇,拍攝同音樂都俾人呢種感覺,去到後段就有一種「柳暗花明又一村」ge感覺,變得好positive。整體來講都幾好,但拍埋去之後ge《穎州的孩子》,比較之下,《穎州的孩子》似乎較好,好在選材,《穎》個選材比較觸動人心,俾人ge印象較深,可能因為主角係細路。

《潁州的孩子》講ge係安徽省阜陽市穎州地區ge一d愛滋遺孤。當地有好多人賣血賺錢,從而感染愛滋,某些地區染病率更達到雙位數字。紀錄片主要探討區入面三家ge小朋友:楠楠、高峻同黃氏三姊妹。佢地ge父母唔係患病就係過左身,而佢地o係父母身上染到呢個病,冇人敢/肯照顧佢地。佢地得幾歲,都未食得飽就要面對殘酷ge世界。好記得其中一個小朋友ge親戚講話唔係唔想照顧佢,而係本身佢都有小朋友,如果其他人知道佢地屋企有個愛滋孤兒,d人就會唔肯同佢d小朋友一齊。因為認識不足,所以有歧視。呢幾個小朋友,同埋其他類似遭遇ge小朋友,好慘

同《朱力亞的故事》相似,後半段又有一種《柳暗花明又一村》ge感覺,後半段講d志願團體點幫d小朋友,又講到高峻有人收留。但到最後,高峻再成人球,要去第二個家庭。好似有一種遺憾o係入面。

我覺得英文片名 The Blood of Yingzhou District有兩個含義:一個係指賣血(而得愛滋)ge 潁州居民,另一個係指佢地ge孩子 (blood又可以解血統)。

Julia同o個幾個小朋友ge故事只係冰山一角,唔係個個好似佢地咁好彩。希望紀錄片令內地民眾關注愛滋病同埋病患者,support好多時係重要過就咁俾錢。

呢個節目有加場,時間係11/9 9:50pm 百老匯電影中心,有機會ge話不妨睇下。


相關閱讀:

預防艾滋病宣傳制作 (Ruby Yang同紀錄片監製 Thomas Lennon成立ge組織,目的係宣揚防治愛滋病ge訊息)

Donald Kwan: 穎州的孩子: 內地HIV+小朋友的路

 

(p.s. 節目開始之前,主辦機構「藍空間」ge 熊秉文 (有時會見到佢o係都市日報出文)作一個簡介。佢提到「藍空間」得兩個人 (意即佢同陳禮恒),相當唔簡單,梗要支持下)

(p.s.2 睇完o係kubrick見到vitus ge台版soundtrack (會員價 $126) 及dvd (會員價$194))

留言(2) | 引用(0) | 話題(點睇)

[2] Re:
半桶水 :
係戲院睇唔到,《潁州的孩子》出碟我一定睇。

有加場喎,都睇唔到呀?

呢個出碟機會我覺得比較微…


[引用] | 作者 Ben | 2nd Sep 2007 | [舉報垃圾留言]

[1]

係戲院睇唔到,《潁州的孩子》出碟我一定睇。


[引用] | 作者 半桶水 | 1st Sep 2007 | [舉報垃圾留言]